سؤال بسيط لكل شخص صريح

مساء الخير ياجماعة
طبعا انا عارفة ان مواضيعى هنا مش كتير لكن انا بتابع المنتدى من وقت للتانى
وكان عندى سؤال صغير وبسيط اوى وياريت الاقى اجابة من البنات وكمان الشباب
دلوقتى انتى بنت جالك شاب عشان يخطبك وبعدين لقيتية بيقولك انا ماحبش ان خطيبتى تكون بتشتغل ولا ليها اصحاب وبتنزل معاهم حتى لو هتشترى حاجات ليكى اشتريها مع مامتك او اختك لكن غير كدة لا وحسيتى منة انة عاوز يقيد حريتك وحركتك وانتى طبعا من البنات اللى بتحبى تتحركى وليكى نشاطات زى الشغل والكورسات وكمان لو عندك جامعة ودراسة وغيرها وفى نفس الوقت انتى مش بتعملى حاجة غلط وعندك وقت كافى عشان خطيبك يشوفك وتشوفية السؤال بقى هل انتى هتغيرى كل الحاجات اللى بتعمليها دى وتوافقية ولا هتتمسكى باعمالك طالما انتى مقتنعة انك مش بتعملى حاجة غلط وان مش من حق خطيبك انة يقيدك ويتحكم فيكى وفى حريتك؟
وياترى لو حاولتى تقنعية كمان وهو مش موافق بردوا حتى انك تنزلى مع صحباتك عشان تشترى ليكى شوية حاجات ومش عاوزك تنزلى الا معاة وبس وتكونى على طول قاعدة فى البيت حتى الجامعة انتى ممنوعة منها ياترى هتعملى معاة اية هتوافقى ولا هتقوليلوا انا اسفة الاسلوب دة انا مش بحبة وطالما اهلى موافقين يبقى خلاص ؟
وانتوا بقى ياشباب لية واخدين الحب على انة تحكم فى تصرفات الطرف الاخر ولية بتكونوا مش عاوزين البنت اللى بتحبوها تتعامل مع اى حد تانى غيرك لية معمالتكم فيها نوع من التقييد اللى مالهوش مبرر فى حين انكم مش بتحبوا اللى يتحكم فيكوا ويحاسبكوا على تصرفاتكوا لية ميبقاش فى نوع من الحرية للطرفين طالما ماحدش بيستغل الحرية دى فى حاجة غلط ولية كمان بتكونوا شكاكين بعض الوقت ولية بتكونوا دائمين الرفض لرغبات الطرف الاخر؟
انا عارفة انى طولت عليكوا وعارفة بردوا ان مش كل الشباب كدة بس انا بلاحظ فى اغلب العلاقات العاطفية الرسمية زى الخطوبة ان فى شباب كتير بتعمل كدة وكنت عاوزة اعرف اية السبب واية هو رأى البنات والشباب فى الموضوع دة

اولا انا بشكرك على الموضوع ده وفعلا مش كل الشباب كده ويمكن تكوني انتي فاهمة خطيبك غلط او هو مش قادر يعبر عن حبه ليكي وخوفه عليكي بالطريقة الصح وشايف انه كدة بيحاول يحافظ عليكي حاولي تفهميه الموضوع ده ببساطة وتحسسيه بحبك ليه وتخلي ثقته فيكي تزيد ومع مرور الوقت هتحسي فعلا انه تغير ولو لقدر الله ماتغيرش فيبقى لازم تخدي معاه موقف وتكلميه بصراحة وتفهميه انه بالطريقة دي هيخسرك مش هيحافظ عليكي
بيارجو اني اكون افدتك واتمنى ان ربنا يوفقك وتوصلي لحل وطمنينا

ميرسى جدا للطائر على الرد و المرور و على فكرة يا ميدو ميرسى على ردك طبعا بس الموضوع ده مش خاص بيا لانى لسه مش مرتبطة لكن الموضوع عجبنى و حبيت نتكلم فيه كلنا نتناقش فيه يعنى مش اكتر و مشكورين على الرد و المرور و منتظرة باقى الاراااء

اولا بشكرك عالسؤال الجميل ده

وانا شايفه ان معظم الشباب لما بيخطبوا بيحسوا ان البنت دى

بقت مسئوله منه يعنى لازم يحافظ عليها بس بطريقته

يعنى فى شاب يبقى حكيم فى طلباته يعنى مش بيخنقها ومش بيسيبها براحتها اوى

يعنى بيخليها تنفذ طلباته وهى راضيه ومقتنعه وشاب تانى بيؤمر بس

وده ممكن يتسبب فى تدمير العلاقه بينهم وانا شايفه ان افضل طريقه

ان اى اتنين مخطوبين لازم يتفاهموا مع بعض وكل واحد يعرف ايه اللى بيضايق

الطرف التانى ويبعد عنه قدر المستطاع

اسفه على الاطاله وشكرااااااااااااااااااااااااااااا ليكى مره تانيه

موضوع جميل جدااا وخااااانق كل البنات ونفسي الشباب تخفف عليهم شويه تسلمي يا قمر علي الموضوع

تسلمي يا جميل على السؤال انا من رأيي انه مادام بيحبها وهي بتحبه يبقى ان شاء الله في امل من

التفاهم والانسان مبيعملش كده الا من عامل الغيره مش اكتر ف أنا مثلا هحترم رأيه ورغبته

وهفهمه اني فاهمه ان موقفه ده من باب الخوف عليا وكده بس برده هفهمه ان الحياه متنفعش تبقى

كده هقوله مثلا لوانا اختك وخطيبها عمل معاها كده وانتوا (اهلهايعني)موافقين ياترى مش هتحس

ان ده كده تشكيك في سلوك اختك واخلاقها رغم ان خطيبها ده ممكن يكون بيحبها انا هتكلم معاه

بالمنطق والعقل ولازم يا اما يقنعني يا اما اقنعه واكيد في الأخر هنوصل لحل وسط يرضي

الطرفين وسوري على الاطاله يا جميل

اختى الغاليه موضوعك مهم جدا وعلشان كده انا هقولك رائى بكل صراحه مش معنى ان هذا الشاب بيقولك متنزليش مع اصحابك او بيرفض شغلك يبقى هو كده بيتحكم فيك وبيخنقك بالعكس ده هو كده بيحبك وعايز يمثل فيك كل الصفات اللى هو بيتمناها فى شريكه حياته او ممكن يكون شايف ان اصحابك دول مش مناسبين ليك ومش عايز يوضحلك لسبب هو عارفه او انه شايف ان تصرفاتك فيها نوع من الحريه الزائده خصوصا ان كلامك بيوضح انك بتخرجى كتير ومشغوله طول اليوم وهو مبيحبش كده ولازم تفتكرى دايما اننا فى مجتمع شرقى يعنى الرجل الشرقى بتميز بالنخوه والغيره اما بالنسبه لحكايه عدم ذهابك للجامعه فانتى لازم تفهميه انه اهم شىء فى حياتك وشويه كلام من الكلام الحلو بتاعكم وبعدها تفاتحيه فى انك لازم تكملى تعليمك ومش شرط اشتغل وصدقينى هتلاقى معاملته ليك اتغيرت مش معنى كلامى ليك انك تتنازلى عن كرامتك وتفضلى تتوسلى اليه وكده بالعكس لازم تحتفظى بكرامتك وكيانك 0 حاجه اخيره هقولهالك اللى بيحب حد بجد بيعمل اى حاجه فى الدنيا علشان يرضي حبيبه من غير ميفكر0

اما بالنسبه لسؤالك ده0
وانتوا بقى ياشباب لية واخدين الحب على انة تحكم فى تصرفات الطرف الاخر ولية بتكونوا مش عاوزين البنت اللى بتحبوها تتعامل مع اى حد تانى غيرك لية معمالتكم فيها نوع من التقييد اللى مالهوش مبرر فى حين انكم مش بتحبوا اللى يتحكم فيكوا ويحاسبكوا على تصرفاتكوا لية ميبقاش فى نوع من الحرية للطرفين طالما ماحدش بيستغل الحرية دى فى حاجة غلط ولية كمان بتكونوا شكاكين بعض الوقت ولية بتكونوا دائمين الرفض لرغبات الطرف الاخر؟
انا عن نفسى لسه محبتش لانى لسه مش لاقى الانسانه المناسبه اللى تقدر تفهمنى واقدر اثق فيها