مبحبش اتكلم في السياسة

مساء الخير ولا صباح الخير حسب التوقيت المحلي لقراءة التوبيك ده
***********
اوقات كتير بنلاقي واحد قرفان من حياته و نفسه في سواق اتوبيس اعمش يطسه و يرحمه من عذاب الدنيا
**************
و تلاقيه يا خويا ماشي في نص الشارع و بيقول انا جدع و ييجي علي طريق سريع يعدي بهدوء رهيب و تيجي تلكمه يقولك ما هو معاه فرامل و تلاقي الناس قاعدة عماله بتبرطم .. و تقول لا حول ولا قوة الا بالله ... الراجل شكل صواميله فاكه
**************
تجيبه تقوله مالك يا عبد العال يا اخويا يقولك خليك معايا يا سعد يا اخويا ... انا بقالي 15 سنة موظف حكومة و مرتبي بيكفيش اشتري بيه عيش حاف باخد 340 جنيه كل اول شهر و مطلوب مني اكل و البس و اركب مواصلات و ادي للعيال دروس و اوديهم للدكاترة لو حد منهم تعب و غير وصلة الدش و وصلة النت وكل يومين يطلعولنا يقولولنا دا معرفش ايه غلي ... دا ابصر ايه زاد ... و تيجي تكلم اي بياع يقولك ايه يا استاذ انت مش عايش في البلد
*************
الواد ابني من كام يوم سخن شوية ... قمت جريت بيه للدكتور و اشي كشف و اشي علاج و اشي اكل ايه و اجيب منين
**************
من كام يوم قاعد ادام الوصلة والاقيلك قال ايه بيعلنوا عن قرية سياحية في راس سدر مش عارف فوق جبل ايه و منظر ايه و بكام ب 2 مليون بس و مش عاوزني اتجنن
بيذلونا ولاد ال **** مش عارفين احنا بنجيب الجنيه ازاي يقوم يقولك 2 مليون جنيه تاتهم 2 مليون جزمة فوق دماغ اهلهم

.
.
.
.
.
.
.
.
.
.

و بعد ساعتين من الكلام لقيت الراجل بيبص نحيتي و بيسألني و لا انت رأيك ايه يا استاذ

فرديت عليه بكل براءة ... اصل انا مبحبش اتكلم في السياسة

و مش عارف ليه لحد دلوقتي ضربني بالجزمة

***********

ملحوظة : القصة متكررة في عالمنا اليومي و اللي عاوز يتفرج ينزل الشارع و يقف يراقب الناس و هي بتكلم نفسها

علي فكرة برضه فيه ناس متعرفش البرادعي ولا جمال مبارك ولا ايمن نور ... فيه ناس معندهاش وقت تهرش ... مفهومهم عن السياسة تتمركز علي السياسة الاقتصادية ليس اكثر

معلش طولت عليكم ... شكرا

موضوع جميل يا جوجو

تسلم الايادي يا قمر

دام تميزك