نصايح لكل البنات لما خطيبك ياخدك يعشيكى فى مكان راقى وجميل

تخيلى نفسك خطيبك عزمك على العشا فى اى مطعم راقى

تخيلى انك سافرتى مع خطيبك اوربا

واتعشيتوا هناك فى مطعم راقى وجميل

ولا بلاش اوربا نخليها مصر

اتعشيتى فى مطعم

العشواية فيه ب200 جنيه

دى شوية نصايح لكل البنات تعمل بيها ضرورى لما تروحى تتعشى

1. الأول لازم تعرفي إن الشوكة والسكينة بيتمسكوا

من إيديهم من الطرف يعني مش م الوسط

ولا من فوووووووووووووووووق

2. العيش أوعي تفضحينا وتقطعيه بسنانك..

ولا الرغيف نصين بأيدك وكل نص لقمة وتحشري..

أوعي.. العيش بيتقطع بالسكينة ف الطبق.. وبعدين تاخدي

لقمة.. لقمة.. بالعافية.. قال يعني نفسك مسدودة..

اضغطي على أعصابك جدااا وبعدين لما تروَّحي..

إبقي حِفِّي زي مانتِ عايزه....

3. الشوووربة.. خدى بالك .. بندالشوربة ده

مهم جدًاااا.. الشوربة تتشرب من غير صوت خالص..

ومن غير ماتقعدي تنفخي فيها.. زي القهوجي

اللي بينفخ ف الحجر للزبون..

وطبعًاااااا عايزك تنسى تمامًا.. السلطانية اللي بتقيميها

على بقك ف البيت.. وتدلدقي على روحك..
بالمعلقه وبدون صوت.. سخنة ولعة برضه بدون صوت..

وتسيبي تلت الطبق ع الأقل.. مش تميليه.. عشان

تلهطيها لآخر نقطة.....

4. الرز طبعاً .. بيتاكل بالشوكة.. أوعي إيدك

تتمد ع المعلقة.. وتغرفي من طبق الرز وتعبي.. إوعي..

الرز بالشوكة.. وكأنك بتبوسيه مش بتاكليه..

5. المكرونة.. الاسباكتي.. برضه بالشوكة.. تتلف على

طرف الشوكة.. لحد ما تخلص وبعدين تحطيها ف بؤك

من سكات.. مش تشفطي المكرونة عود عود..

6. السمك.. مشكلة.. شوفي.. بتفصلي اللحم

عن الشوك.. إزاي..؟؟
تقطعي اللحم من النص.. بالطول وبعدين تفردي اللحم
ع الجانبين ولما تخلصي ناحية.. متقلبيش السمكة..
بلاش فلح.. شيلي السلسلة بالشوكة والسكينة وحطيها
ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص..

قولي مابحبش السمك وخلصي نفسك..

7. الجمبري.. -إذا كنتي عارفاه-.. أول ماطبق

الجمبري ينزل.. بصيله بقرف واحتقار شديدين..
آل يعني زهقانة من كتر أكل الجمبري الجامبو فى بيت ببااااا.. وأتنهدي جامد وقولي.. برضه..؟؟؟
وتروحي قاطعة راس الجمبرياية.. بالشوكة..

أنا ف عرضك إنسي المصمصة دلوقت..

8. البطاطس سواءمسلوقة أو محمرة.. أوعي تهرسيها

وتدبيها ع الرز وتدي ...لا..لآ...لآ...بالشوكة حتة حتة

وإنت زي ما تكوني هاتعيطي من كتر ما البطاطس

صعبانة عليكي..

9. الفاكهة.. لو الفاكهة فيها بذر.. طلعيه من بؤك

بالراحة وحطيه فى إيدك وهي مقفولة..
وبعدين فى طفاية السجاير اللي ع الترابيزه..

أوعي ياحبيبتي من نظام التفتفة للبذر.. إنسي....

10.ولما تخلصي أكل تحطي إيدك على بطنك..
-اللي عصافيرها بتصوصو من العينات اللي كلتيها-..

وتقولي له مش ممكن.. أنا عمري ما اتفجعت كدة..

أنا أودامي أسبوع.. هابطل أكل فيه.....

وبعدين تمسكي الفوطة اللي دايمًا موجودة ع التربيزة

من غير لازمة.. وتبوسيها.. آل يعني بتمسحي بؤك..

وبعدين تستأذني منه لدخول التوليت لإصلاح ماكياجك..

وتخشي التواليت وتطلعي من شنطة إيديك.. لفة الفول

والطعمية اللي جايباها معاكي..

وبالهنا والشفااااااااااااا

ماشي يا احمد جامد جدااااا
بس بقى كده تفرقه عنصريه فين بقى النصايح للشباب
بجد طلعتيني من اللي انا فيه شويه
خليتني اضحك
ميرسي لموضوعك

نصايح الشباب هتبقى قريب ان شاء الله

متقلقيش

شكرا لمرورك وياريت لما تتخطبى تعملى بالنصايح دى

هههههههههههههه
موضوعك هايل يا احمد
بس والله نصايح حلوه ممكن تفيدنا برده
بس هنستني منك نصايح الشباب اكيد

اوك يا احمد
منتظره منك النصايح للشباب

ههههههههههههههههههههههههههههههههههههههه شكرا ع النصائح الجامدة دى ،بصراحة موضوع يموت من الضحك ،الواحدة بصراحة مكنتش عارفة هتعمل اية من غير النصائح دى ،شكرا يا احمد على موضوعك وربنا يوفقك

هههههههههههههههه
الموضوع جــــــــــامــــــــد
ونصايح مهمه خالــــــــص واهم حاجه سندوتشات الفول والطعميه
اياك حد ينساهم.....الجوع وحش

حلو اوى موضوع الجمبرى والبطاطس ده
ههههههههههههههه

ههههههههههههههه بجد موضوع لذيذ وجمييل جدا بس ليه كل دا ما بلاش يتعشو احسن فى مكان راقى وجميل لازم ياعنى يعملو فيها رومانسين بقى والكلام دا وهما مالهمش فيه خالص نصيحتى انا بقى خليكو قاعدين فى البيت اهو ستر وغطا مرسيه ليك

ههههههههههههههههههههههه
موضوعك جامد يااحمد
وميرسى على النصيحه
بس ياريت محدش ينسى
سندوتشات الفول والطعميه