انا والبطيخ وهواك ....... مع جعفر منير وحلقتنا الاستهبال فى الحب

بسم الله الرحمن الرحيم

سلام عليكم يا اجمل اعضاء

انا و البطيخ وهوااك .. برنامج .. للحب.. و عن الحب

مع جعفر منير

الحب

ذلك الشعور السهلبيسي الذي يزغزغ عقول البشر

و يهشك قلوبهم

مستمعينا لسه بنتكلم عن الحب وحلقتنا النهارده عن

الاستهبال في الحب

معاكم جعفر منير علي نجوم fm مزيكا علي كيف كيفك

في.. انا و البطيخ و هواك

من دلوقتي ولمدة ساعتين
مستنين تليفوناتكم علي 0000000
او علي 01000000000
او علي ايميل البرنامج
علي هواك ات نيل راديو بروداكشن دوووت كوووم
برعاية ابليس كومباني و ان تاتش و كريمات زحلقها

دايما بتمر بينا اوقات بنحس فيها اننا مش قادرين نعيش من غير الحب و من غير الحبيب
و الشعور دا متولد و منبثق من الاحساس التواجدي الكوني في اللامركزيه العصبيه للقلب
و دايما بتقابلنا مواقف كلها استهبال في الحب

ياترى احنا بنعمل ايه و رد فعلنا بيكون ايه لما نقابل حد بيستهبل في الحب ..
وخصوصا اننا جيل موبايلات و انتوا عارفين ان انا عندي 23 سنة فحاسس بيكم و حاسس بمشاكل الجيل كلها ...

اولا الرصيد اللي بيخلص في يوم و انت لسه شاحن كارت ب 100 و تفضل تحرق في دقايق علي حبيبتك و في الاخر لما الرصيد يقرب يخلص تقولها بحبك بحبك امموووه
تقولك انت بتستهبل يا حبيبي اتلم شويه عمو ( سويرس ) يشوفنا
اصل هى 012

او حبيبتك اللي تفضل تكنسل عليك تكنسل عليك عشان استخسرت فيها كوزين دره علي الكورنيش
و انت اصلا مفلس مش لاقي تاكل و لما تيجي تصالحها علي الموبايل تلاقيها بتكنسل ..
فتضطر تصالحها بكارت ب 5 و تستهبل .. تلاقيها بتصرخ في وشك و تقول
انت بتستهبل؟؟
اقل من 200 متورنيش خلقتك

و حبيبك اللي ييجي في اوقات يعمل فيها عالم فلك و يقولك انا بقرا الكف
و يفضل ماسك في كف ايدك ولا كأنه شاف ايدين قبل كدا
و في الاخر تقوليله
انت بتستهبل ؟؟ حد يشوفنا

مستمعينا الاستهبال في الحب حالة بتمر بكل المهاطيل و المهابيل من ابناء الجيل و لو مستخدمناش عقلنا في الاستهبال بيقلب عباط
وممكن مغص كلوي

مستمعينا مستني تليفوناتكم علي020000000
او علي 0100000000
0110000000
0120000000
ده ارقام الموبيل

او علي ايميل البرنامج
علي هواك ات نيل راديو بروداكشن دوووت كوووم
برعاية ابليس كومباني و ان تاتش و كريمات زحلقها ياما زحلقها

نستقبل اول اتصال تليفوني و نقول الوو

الوو

الووو

الووووو

انتى يا حاجه

واضح ان الخط قطع

- الوو ايوا يا لولو

اهلا نتعرف بيكي ..

- بثمه من بنــــــــــــــــها

اهلا بيكي يا بسمه ياريت تعلي صوتك شويه

- معلش يا لولو اثل انا بتكلم من تحت البطنية ..

مفهوم طبعا عشان محدش يقفشك و انت بتتكلمي
بثمة بنتكلم النهارده عن الاستهبال في الحب .. تقدري تقوليلي يعني ايه الاستهبال في الحب و بيمثل لك ايه

- بص يا لولو اولا انا بموت موت موت جدا في البرنامج بتاعك و والله مش بفوت ولا حلقة منه ابدا خالث
و ثلملي علي الشقي الحكروت موت موت حتومه و قوله انه لذيذ اووووي و بنحبه مووت موووت ..

هو بيضحك وفاتح بقه زي الحمار اهوه و بيقولك
مرسي ليكي يا بسمه

- يا لولو انا بكلمك عشان الحلقة بتاعتك النهارده مخثوث عشاني
انا كنت بحب واحد و انا في 2 ابتدائي و فضلنا نحب بعض للجامعة

جميل

- اهـء اهـء اهـء

لا اهدي يا بسمه و قوليلي ايه اللي حصل

- يا لولو اخد كل حاجة كل حاجة

اححمم
حتى الموبايل
خد الموبايل يا بسمه

- يا لولو بقولك كل حاجة
اهـء هـء هـء

طيب اهدي يا بسمه
بصي يا بسمه
الحب شعور متبادل بين اتنين
مينفعش طرف واحد من غير الطرف الاخر و لازم الاتنين يكونوا متفاهمين و متعاونين
هو دا الحب اللي هايدوم طول العمر و بكدا نحل كل المشاكل اللي تقابلنا حتى مشكلة غسيل الالوان مع الابيض .. لان تايد
برغوته الجديدة حل المشكله

مستمعينا نسينا نقول ان تايد من رعاة البرنامج
مع تاااااايد في الغسيل مفيش مستحييل

بشكرك يا بسمه علي اتصالك و بهديلك اغنية السوبر ستار

يا قاعدة علي الترعه و بتغسلي المواعين
جاتك ستين وكسه أخدتي أيه من الغسيل

نص ساعة اعلانات ..

انا و البطيخ و هواك برنامج للحب و عن الحب

مع جوجو قصدى جعفر

الله يخرب بيتك يا بسمه

لسانى اتعوج

الحب
لحظات من الامل متولدة في وسط غابات الغضب البشري الجارف المتعارض مع احداث الحياة
فالحياة بدون حب
كالشجرة بدون قرود ..

مستمعينا لسه بنتكلم عن الحب و لسه بنسأل عن الاستهبال في الحب
مستني تعليقاتكم علي020000000 او علي 0100000000
0110000000
0120000000

او علي ايميل البرنامج
علي هواك ات نيل راديو بروداكشن دوت كوم برعاية ابليس كومباني و ان تاتش و كريمات زحلقها و بيبسي و كوكا كولا و تايد و برسيل و اومو و اريال ..

الوقت بيمر معاكم بسرعة و حاتم بيضحك مش عارف علي ايه بس تقريبا عشان البت اللي بتبيع ترمس علي كوبري ابو العلا حولت له 5 جنية رصيد ..

هاه ؟؟ عشره رصيد

طيب اشطه يا حتوم .. اخوك بقا هاه

نستقبل اتصال تليفوني و نقول الووو

الووو

الووو

الوووووو

يووووووه انتى يا بت

الظاهر الخط قطع

الوو ايوا يا ويئو

اهلا نتعرف بيكي
ياريت تعلي صوتك لان الصوت بعيد اوي

_معلش اصل انا بكلمك من الحمام

انا اسماء من المنصورة

اهلا بيكي يا اسماء

سمر بتكلم النهادرة عن الاستهبال في الحب
انت ايه رأيك في الاتستهبال عامة و خصوصا في الحب

_ويئو انا عاوزه اقولك في الاول انت انت احلى و اجمل اعلامي و صوت شفته في حياتي و انا بسجل كل الحلقات بتاعتك و بحبك اوووي يا ويئو

ربنا يخليكي يا سماح ..

انا كنت بحب واحد نجار مسلح و بعدين كنت في يوم ماشية في الشارع لابسه باضي جميل و ديق موووت و بعدين واحد عاكسني فحبيبي شلحف

مين يااسماء ؟؟

_شلحف هو اسمه شادي بس انا بدلعه شلحف
قام ضارب الواد اللي عاكسني بالحديد شاقق له دماغه
هو دلوقتي في السجن
و انا بحبه اوي يا ويئو
و مش عارفه اعمل ايه
و اهلي بيضغطوا عليا مووووت مووووت عشان اتجوز واحد قد ابويا
ويئو انا مش عارفه اعمل ايه
أنا بحب شلحف أوي

بصي يا سيدة

_اسماء

اه سوري

بصي يا اسماء

بنقابل ناس في حياتنا بنحبهم و بيحبونا و ديما كتير بنكون شبهم و زيهم .. حتى الحب نفسه سعات بيحب انه يتكون على حبيب و حبيبه
و حبيبك بيحبك و ان شاء الله يطلع بالسلامة
بس تعرفي هو لو كان الحديده مصنوعه من حديد عز اكبر مصنع في الشرق الاوسط و المصدر الرسمي لحديد الجدار العازل كان حبيبك زمانه مشنوق دلوقتي لان حديد عز يتميز بالصلابه و القهوه و السيخ مظبوط و بالتمام ..

شكرا يا ساره على اتصالك و بهديلك اغنية السوبر ستار

يا مسجون في لومان طره
نفسي اكل معاك كوز دره

مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 020000000او علي0100000000
0110000000
0120000000

او علي ايميل البرنامج
علي هواك ات نيل راديو بروداكشن دوت كوم برعاية ابليس كومباني و ان تاتش و كريمات زحلقها و بيبسي و كوكا كولا و تايد و برسيل و اومو و اريال ..

نص ساعة اعلانات

مستمعينا لسه بتكلم عن الحب و لسه بنسأل عن الاستهبال في الحب
مستني تعليقاتكم علي 020000000
او علي0100000000

او علي ايميل البرنامج
علي هواك ات نيل راديو بروداكشن دوت كوم برعاية ابليس كومباني و ان تاتش و كريمات زحلقها و بيبسي و كوكا كولا و تايد و برسيل و اومو و اريال ..

اس ام اس كتيرررر جدا النهاردة

هااي جعفر بحبك مووت... وبحب صوتك .. .. بجد وهدؤك بالكلام انا بحبك اوى موووت انا اتعرفت على واحد من ع النت وقابلته بس نفسى احسسه بمشاعرى اعمل ايه ارجو الرد يااحلى اعلامى واعذب صوت فى الكون..
__________________

هاى ياجعفر ازيك يا جميل
البرنامج جميل جدا وانت كمان مواضيعك تحفة .. وعايزاك تقول لجابر انى بحبه جدا وميزعلش منى ابدا.. رغم كل اللي بيعمله و رغم انه قليل الادب و دايما بيعمل حاجات سوفاج بس بحبه
بحبك يا تامر
قصدي يا جابر
حبيبتك شاهيناز

__________________

هاى مونتو عامل ايه يا غالى انا محمود من الاردن عاوزك تقول لهبة اننا مش هانفترق تاني ابدا ابداا
حتى لو فضلت تقرقض في ضوافر رجليها ببقها ..
__________________

هااي يا عسليه ازيك
يا جعفر عاوز الايميل بتاعك بجد في مواضيع مهمه قوي عندي عاوز الحل ليها .. معلش يا جميل بليز و الله يا جعفر

انا تعبانه موووت و انت الامل الوحيد ليا ..

__________________

هااي ياجعفر
انت اجمل و احلي صوت في الكون كله
ارجوك ياأ/جعفر قول لحسن انه مهما دور على حد ممكن يحبه ويسامحه ويغفر له كل حاجه مش هيلاقى غيرى لانى بحبه بصدق ومش عاوزة منه اى حاجه
خالص.. و هتنازل عن تمن الموبايل اللي ضربوا مني في الشهر اللي فات و باعه

__________________

جعفر جعفر جعفر

ازيك يا جميل

على فكره يا عم انت شوفلك حل .. حبيبتى بتحبك

انا محمدين من دمياط .. بحبك قوى يا رضوى

__________________

هاااي يا يا عم لولو ازيك عامل ايه
انا عارفه ان الحب مفهوش كرامه وهو الى خلانى بقيت كدة ازاى بعد كل دة هو اللى يبعد ويختار هو علمنى ازاى معرفش اعيش من غيرة ونسى يعلمنى لما يبعد هعيش ازاى ... بحبك يا بعجررر
__________________

هاااى جعفر انا فى عندى مشكله انا بحب واحده ومش عارف اصرحها خايف يكون الحب من طرف واحد
بحبك يا سندس ااوووي و نفسي اخد الرصيد اللي في موبايلك كله ..
حبيبك كيشو

__________________

هاااي جعفر ازيك
انا سنية من القاهرة
انا بحب واحد قد ابويا و مش عارفه اعمل ايه بحبه موووت مووووت يا وائل عشان شعره الابيض الجميل و فجأة اكتشفت انه سمكري سيارات و ان البويه جت علي شعره
وائل انا مش عارفه اعمل ايه انت املي الوحيد
__________________

هاااي جعفر ازيك
انا عيوشه من شبرا و بحب واحد من الصعيد
و اتخانقنا بس لما سمع الحلقة بتاعت البرنامج اللي فاتت جاني تحت البلكونه من الصعيد مشي و قعد يعيط و انا بحبه خالص يا عم وائل
بحبك يا صميده موووت موت

الوقت بيمر معاكم بسرعة وقت حلقتنا انتهى و حاتم فرحان مش عارف ليه
باين البنت بتاعت الدره حولت له رصيد تاني
كان معاكم وائل فايز علي نجوم اف ام مزيكا علي كيف كيفك
في انا و البطيخ و هواك من 12 لـ 2
بشكر كل اللي كلمنا و اللي بتعت ا س ام اس
مع انا و البطيخ و هواك استنوتا يوم الحد في نفس الميعاد قبل ساعتين من دلوقتي علي نجوم اف ام 100.6
مزيكا علي كيف كيفك

برعاية

وان تاتش
ولعتين
و مؤمن
رويال كير
وام اشرف
وآبلز
و كنتاكي
و مصنع كوبايات ام سمير
و كراسة الاول
سلاح التلميذ
وسوق السباعى
مصنع كريمات ام عويس
كوافير ام ابراهيم للسيدات و قسم خاص للمحجبات
مزرعة دواجن ابو احمد لتسمين العجول
نادى قحافه
اديداس و بوما
اميجو كوتشي بينور
امريكانا الجودة
لانشون حلواني الإخوان
منظمة التحرير الفلسطينية
مجلس الشعب
سمنة البقرتين

معليش طولت عليكم
استاذن بقه
علشان احضر لحلقه يوم الاحد

ههههههههههههههههههههههههه موضوعك جميل جداااااااااااا يا احمد

يااااااااااه كل دى اسماء انا توهت واللهى بس يا جعفر البرنامج دا بجد جااااااااامد قصدىىىى احمد بس ياريت تقولى هو الثاعه كام قصدى الساعه ايه فى ايه المهم علشان اتابعه لانه عجبنى جدا وعلشان كمان ابعت اس ام اس بث واحده بس علشان الرصيد وانت عارف بقى ازمه الموبيلات لالالالالالا الموضوع بجد دمه خفيف جدااااااااا ربنا يوفقك

شكرا للردود

وشكرا ليكى ياسندرا

بس ابعتى الاسم ام اس الرسالة ب 5 جنيه

شوفى معاكى رصيد ولا لاء

بجد والله يااحمد الموضوع

جميل اوى ودمه خفيف بجد

اتمنى مزيد من اللحلقات الجديده

بس مش شايف ثمن الرساله رخيص اوى

حاول تغليه علشان تكسب يابنى اتمنالك التوفيق

so funny

شكرا لمرورك